Komande helg inviterer 2STA til loppemarknad på skulen. Frå fredag 14. til søndag 16.november vil skulen vere fylt med alt fra små skattar og bruksting til bøker, leiker og møblar - alt til ein rimeleg pris. Inntektene går uavkorta til klassen si planlagde faglege reise til Berlin neste skuleår.
Turen til Berlin har gjennom mange år vore ein fast og viktig del av undervisninga ved skulen. Her får elevane møte historie og kultur på nært hald, og dei får oppleve korleis tema frå klasserommet kjem til liv gjennom besøk på museum, historiske stader og kulturinstitusjonar.
Med prisauke på både reise og opphald krev det meir innsats enn før å samle inn det som trengst. Elevane i 2STA har lagt ned mykje arbeid i førebuingane - frå å samle inn og sortere lopper til å organisere kafe og marknadsføring. Arbeidet har vore både lærerikt og sosialt, og viser eit stort engasjement for å nå målet sitt.
No gler elevane seg til å ta imot alle som kjem innom. Dei håpar at foreldre, vener, naboar og andre i lokalmiljøet vil kome for å handle, slå av ein prat og vere med på den gode stemninga. For elevane betyr støtta mykje - både som bidrag til turen og som ei oppleving av fellesskap og engasjement.
Opningstider for loppemarknaden:
🕓Fredag: 16.30 - 19.30
🕙Laurdag: 10.00 - 18.00
🕙Søndag: 10.00 - 14.00
Under loppemarknaden blir det og kafe med sal av mat, drikke og noko søtt - eit hyggeleg samlingspunkt for alle som kjem innom.
2STA ønskjer alle hjarteleg velkomne til loppemarknad no til helga - til støtte for eit lærerikt og minnerikt prosjekt som kombinerer både fagleg innhald og felleskap!